GT-R水溫高到驚
讀者KK：「上年我用13萬買了部只換了胎軨、避震和死氣喉的96年GT-R R33，上手車主keep得極新，全車只行了5萬公里，駕了差不多1年都一切正常，但上個月開始每次谷完車水溫（已裝水溫表）都升過100℃，我想問部車有咩問題，會唔會死偈？」

維修專家志偉：「由R32至R34 3代日產GT-R，水溫（正常90℃至100℃）同油溫（正常90℃以下）一直存在偏高問題，原因係引擎艙空間較窄，加上twin turbo運作極高溫，就算原裝車長期激踩都會有呢個問題，最有效解決辦法可以換大容量銻水箱（$4,000起）、加裝水箱導風板（$500至$600）或低溫水膽（約$1,000）。然而讀者要留意，RB26DETT引擎最接近車廂2個氣缸因為散熱問題，通常都比前面4個氣缸高溫，簡單有效方法是將阻礙散熱的coil蓋拆除、自行用金屬戒指升高頭蓋或換通窿頭蓋（約＄4,000）。」

另外，志偉講到保養方面，說R33已超過10年車齡，兼且車重超過1,500kg，現時底擔零件及engine喉管已經會出現老化，最好去車房做1次詳細驗身。

踩迫力「刮、刮」聲
讀者Ken：「本人的03年Jazz由新車買到現在，行了6萬公里，最近發覺在踩迫力時有『刮、刮』聲，問過朋友他說是冇迫力皮，後來我換了套全新廠皮，但問題依然存在，而且怪聲愈來愈大，點解會有呢個問題？」

維修專家Wing：「首先讀者發覺踩迫力有怪聲，應要即時到車房進行檢查（約$500），事關呢部分關乎到行車安全，依照讀者所講踩迫力時有怪聲，最大機會是迫力卡鉗有污糟o野走o左入去，又或者係頭雞髀杯士有損壞（更換約$2,000至$3,000）。讀者亦應要留意，Jazz尾轆係用鼓式，平均2至3年要檢查1次，冇尾皮一樣會導致踩迫力有怪聲（更換約$1,000-$1,300）。」

Wing再補充，想安全一點，最好每年check一次迫力，或將原廠dot 3迫力油upgrade至效能更高的dot 4（約$450），換後無論制動反應與效能都會有顯著提升。