點先知慳唔慳油？
想問買車前可以點知道架車慳唔慳油呀？

「買車前想知道架車慳唔慳油，可以睇番原廠資料，因為每部新車既spec.都會列明詳細耗油量，如城市、高速公路及平均耗油量等，通常以L/km單位作表示，即是行1公里需要用幾多公升油，計番每升油價就知架車行幾錢一公里。如果香港代理既catalog冇，可以上番車廠網頁搵詳細規格。」

不過阿Wing說易手車因已行走一段時間，狀態視乎上手保養是否得宜，所以原廠數據只可作參考，而且通常不能做耗油測試，只可旁敲側擊地了解耗油情況。某些新年份車如Stream等會有電子耗油量表，雖然準確度不太高，但亦可估計實際耗油量。如果沒有的話，就要到車房找經驗技師check，通常檢查風油比、火嘴、死氣喉、廢氣等，都可以了解引擎燃燒效率高不高及會否供油過多，從而推斷出該車是否大食，不過要準確就必須做耗油測試。

凍車迫力吱吱聲！
本人購入06年平治A150易手車，運作一切正常，惟獨踩brake有吱吱聲，故往車房換了前後brake皮，吱吱聲是減弱了，但每朝凍車時開車第一下 brake一定發出『吱』一聲，但行車後又沒有了。請問是什麼原因？

「據Maisie所講，之前踩brake有吱吱聲，應該係因為brake皮到期，換皮後因為brake皮上既物料唔同0左，例如少0左brake粉，所以冇0左呢個問題。而現在凍車開車第一下brake發出『吱』一聲，最大機會係brake皮移位，同行車耐、踩brake多而導致brake皮過熱，有brake粉黏0左上去皮度，又或者用0左雜廠brake皮所致，所以最好返原廠check0下同更換番原廠brake皮，更換原廠brake皮連工包料價錢約$1,100左右。」

最後大雄亦提到，年份較新的歐洲車，機件上好少有太大問題，通常問題只是出現在電子零件方面。如果想架車keep得好，最好一年大check一次，費用約$800，亦要勤換偈油、油隔，連工包料$800左右。