MIVEC冇反應？
讀者RICO：「本人有部96年三菱Lancer MR棍波用MIVEC引擎，部車全原裝，平日多數都低轉行車，約三千轉就轉波，但有日踩到六千轉左右都感覺唔到部車有特別加快，未知是否MIVEC系統有問題，想問點解會咁，呢款引擎有冇特別保養方法？」

維修專家大雄：「MIVEC應該o係五千轉左右介入，好容易感覺到，如果真係感覺唔到就好可能出現o左問題，可以先換偈油、油隔後，睇有沒有改善，若果問題仍然存在，則有可能valve長期使用磨蝕損毀，導致開唔到MIVEC（維修費約$3,500）。一般車房檢查問題大約$500，如果更換其他零件就要看個別車房而定。」

最後大雄亦提及這款引擎非常耐用無需特別保養，不過這款車都有個通病，就是偈油泵易壞，不過此乃小問題。

ABS燈長著？
讀者Terry：「本人兩個月前買了部96年豐田Camry 2.2自動波，上個星期開始表板既ABS燈就開始著，起初覺得冇咩問題，不過早幾日發生o左o的突發事要急剎，架車就lock晒車太覺得好危險，請問我應該如何處理，如果有問題要整，價錢貴唔貴。」

維修專家阿Wing：「ABS同車內好多sensor有關連，壞o左絕對會影響駕車安全。車主可自行檢查迫力油夠唔夠，如果冇問題既話，則多數是ABS泵或sensor壞o左，換個正常既易手ABS泵連工包料約$2,000。」

最後阿Wing建議車主盡快去維修，如果冇了ABS在路面濕滑和需要緊急剎車時車胎會鎖死而不能轉向，對於一般駕駛者來說，非常危險。