DC5著晒燈
讀者Lan Lan：「我部本田DC5幾日前發覺車頭表板著了引擎燈，買返o黎架車有個後加VTEC控制器SFC，但係我又冇掂過，點解會著燈，同埋點樣自己校番好呢？另外車上有個EPS掣有什麼用？我非常心急請盡快回覆。」

本田維修專家鍾師傅：「通常加o左VTEC控制器而著引擎燈，好可能是由於供油調校得過濃而導致死氣喉的O2或AF sensor壞掉，亦有機會是供油過濃令sensor向電腦作出警告而著燈，當然著引擎燈好可能有其他因素，最好都係電腦check車（$500）咁就最清楚對症下藥的方法。」

鍾師傅提到DC5本身是沒有電子車太尺，即EPS，所以唔明白讀者的DC5為何有EPS掣出現，他表示同期的本田房跑車，只有EP3 Civic Type R及Accord車系才有EPS電車太。

換完電都冇電？
讀者世華：「我部97年萬事得Astina上個星期冇電以為電池老化，到車房買了電池返去換，但過了幾日，又再次冇電，究竟咩事呢？搵人檢查又要幾錢呢？如果長期唔駕又開o左防盜，大約幾耐會冇電？」

維修專家Norman：「如果照讀者世華所講，好大機會係『打南磨』出問題，未必關電池本身老化事。而『打南磨』作用係負責幫電池充電，如果出現問題，就會無法充電，正常行車幾日就會完全冇電，連車都著唔到。如果『打南磨』檢查過係正常，就有可能係皮帶鬆，帶動唔到『打南磨』發電，要檢查大約$100，若需更換，易手約$1,000，全新約$2,000。」

Norman亦指出如果長期唔用車最好就是拔掉電池的電源，以免防盜或車內其他電器令電池耗電。一般而言，開了防盜大約個半星期至兩個星期才會用盡電池，若果開防盜幾日就冇電最好盡快搵車房檢查。