VTEC點解唔識著？
讀者阿榮：「本人部本田DC2在高轉行車時VTEC沒有開，想問咩原因，可以怎樣修理？如要修理大約要幾錢？還有我想問這款車應該如何保養最好？」

本田維修專家鍾師傅：「首先如果部車係自動波改棍波既話就有機會改裝時有電線駁錯或冇駁。若果本身係棍波，就有幾個可能性，第一可能VTEC sensor有問題；第二如果改o左電腦有機會程式唔o岩用；第三如果曾經拆過支cam，有機會裝漏cam碼膠圈同一條好細小既鐵通。如果要檢查咩事，價錢大約$300。」

最後鍾師傅更提到這款車要保養並不是太難，因為市場上有充足配件，平日只需定期換偈油，而這款車最易壞的就是分火器，有問題的初期不易發現。

停o左車、仲識轉？
讀者阿盛：「本人部97年原裝三菱VRM，買了返o黎一個月，最近發現熄車後風扇仍然轉動，究竟係唔係正常呢？」

維修專家Norman：「如果熄車後風扇仍然著係正常，因為當你熄車既時候引擎溫度仍然好高，所以就算你熄車，風扇仍會轉動，幫助引擎散熱保護引擎，所以熄車後5分鐘內仍然轉動都算正常，視乎你之前駕得快定慢。如果熄車後風扇長時間都唔識停就有機會恆溫電阻有問題，你亦可檢查水箱水夠唔夠。」

最後Norman提出個方法畀大家，令熄車後風扇唔會轉咁耐，差不多返到停車地方前5分鐘盡量唔好駕太快，而且此舉更能保護引擎，令引擎壽命更長。