坐滿人嚓嚓聲？
讀者黃生：「我最近買了部98年三菱Lancer MX，坐滿人之後經常聽到有嚓嚓聲，請問是否避震開始老化唔掂呢？另一個問題係引擎能否用水沖洗呢？」

阿Wing：「首先要睇番你胎軨既off set o岩唔o岩，因為有機會條胎闊o左同擺出o左而刮到沙板，你可以從側邊水平望，睇o下條胎會唔會貼住沙板。之後應該檢查埋你套避震有冇cut短o左彈弓o黎low down部車，負重時會容易D刮到沙板。如果以上兩點都正常，就應該係避震老化，只要換避震就可解決問題，易手避震只需2、3千元就有交易，不過要小心選擇狀況良好既易手零件。」

另外，阿Wing又說引擎最好不要自己沖洗，因為引擎艙有很多電子零件，不慎整濕就可能要報銷，而且專業清理引擎艙亦只需$200-$300。

Brake唔夠可以「攝」
讀者阿發：「本人部97年Civic EK，近期覺得個brake唔係好掂，之前聽個朋友講可以『攝』brake皮，想問o下這個辦法可唔可行，而且佢話手掣同極力子都可以『攝』，又可唔可以呢？」

鍾師傅：「其實所謂『攝』brake即係墊高o的brake皮，即係將迫力皮磨薄之後多出既虛位收番窄，令腳掣唔會踩到太低先有反應，其他會磨損既部分如極力子都可以攝。不過只係鼓式煞車先可以攝brake，如果用碟式煞車既就只可以攝手掣，價錢約$200-$300，但只可以暫時解決唔夠迫力既問題，到迫力皮磨到有金屬聲時就要即刻換。而且唔夠brake有好多原因，例如迫力皮同迫力碟過熱、迫力碟變形、迫力皮到期等。另外，極力子同樣可以攝，將腳掣既磨擦點校番低D，但一樣係治標唔治本，時間耐o左會愈來愈唔識彈上o黎。」

鍾師傅亦建議如果迫力有問題應盡早去車房check，因為行行o下冇brake停唔到部車好容易發生意外，更換頭尾原廠迫力皮價錢要$1,400，而更換雜廠的就只需$900。