起步轉波出怪聲?
讀者Rex：「我架車係98年Honda Odyssey，每當起步或轉波時，死氣喉都會好嘈，D聲好似有水噴出o黎咁，但係行順車或大油起步又冇。請問是否因為D油燒唔盡所致？如果維修要幾錢？」

「我唔明白好似噴水咁聲係點，但每當起步或轉波時死氣喉有怪聲，就有好多可能。簡單既可能係死氣喉既螺絲鬆o左又或者有石仔攝o左入防撞板之間，起步或轉波震動較大時就會響。不過就好少會好似阿Rex咁講因為燒油唔盡而發出怪聲，反而有可能係因為催化器內部散o左，導致碎片o係內部磨擦而發出聲響。去車房checko下先知真正原因。」

另外，鍾師傅亦提到這款車的其他通病，如換完cam帶後好多時會有漏油問題，最好換cam帶時一併更換平衡軸膠邊同油墊，連工包料$2,500。而且波箱亦要多加留意，好易有空波或少一個波的情況出現，更換二手波箱連工包料$6,500左右。

NCB點樣儲耐o的？
讀者Ryan：「我上年12月賣車之後冇駕車，但之前已經儲o左60個NCB，聽朋友講一年唔買車保就會冇晒o的NCB，請問係咪真呢？同埋點先可以儲NCB耐D？

「NCB正確叫NCD（No Claim Discount），買汽車保險時會有折扣，要完成一年保單兼冇索償過，保險公司先會畀10%車主（私家車第一年會有20%），而且要逐年儲，最多都只可以儲60%。但如果中途有意外，索償過或中途取消保險，o個年就唔會畀NCD你。而累積既NCD紀錄最多只可以hold住一年，一年內唔續保就要從頭儲起，冇方法可以留耐D。如果想之後駕車買保險平D，最好係12月到期前再買車同買車保。」

阿Roy亦提到車主必須注意，一經向保險公司申報claim錢問題，保險公司就會即時扣起最少30% NCD。