提起MPV行宮Alphard，大家會即時諗起名人、紅星用家，其實更多車主係廠佬，經常要坐住中港兩邊走長途，舒適性固然緊要，但更加精打細算。雖然早前Alphard已推出更慳油嘅240入門版，不過今年facelift再有全新Hybrid版，耗油由350頂級版9.3km/L大減至17.0km/L，對於粗咪嘅中港車嚟講，話咁快已經可以慳番畀多咗幾萬嘅車價！最緊要係工廠每年製造出成千上萬噸污染物，買架環保行宮排少啲廢氣當積吓陰德，使錢都使得更心安理得！

車廂空間超大、內籠豪華過酒店套房嘅MPV，因為有咁上下車重，根本唔可能用細容積引擎，現時最少都要用到2.4公升，先可以達到既有合理油耗、又有相當性能表現。但係買呢類車嘅人大多已有部百萬名車，又點會慳十幾萬車價而買部加速力平平嘅入門版？所以十居其九都係買頂級350版，用更多油之餘又排更多廢氣，同熱爆嘅環保潮流背道而馳！不過頭上戴上環保光環嘅Alphard Hybrid，就有可能令買家回頭是岸，為自己建立個綠色形象嘞！

藍色為記

講真嗰句，要環保就要用輕車身、細引擎嘅車，好似Alphard擁有超過2噸車重、最少都用2.4公升引擎，根本天生就唔係慳油環保分子，推出Hybrid版就係要撥亂反正，希望喺有限嘅條件下做到最慳油。Alphard Hybrid同facelift版Alphard一齊推出，外表上都有少少唔同，除咗可以用泵把射燈區分，唔難發現Hybrid版車身有多處換上專用藍色章，而且沙板同車尾都加入「Hybrid」同「E-Four」章，明確表示環保身份之餘，仲要講明係四驅！

繼續豪歎


為咩買Alphard？就係貪佢中排有2張Royce-Rolls都冇嘅飛機商務座位！冇咗佢哋，買部Previa都差唔多！既然2張座位極之有標記性，Hybrid版又點可以冇咗佢哋？基本上Hybrid版個車廂同350版本一樣咁豪，除中排之外，車廂頂仲有10吋touch screen影音系統、新增納米離子空氣淨化系統、高度防紫外光玻璃，令車內有更舒適乘坐感。此外，前乘容座旁增設電動掣，方便左邊中排乘客（通常都係老闆坐）將前座校到最前，雙腿有更大空間，上落車亦更方便。

其實只要坐過或睇過Alphard車系嘅車廂布局，就會明白為何近年可以同歐洲百萬豪車爭客，根本車廂空間同乘坐舒適性已K.O.任何一款車，就算以現時最貴嘅Alphard Hybrid都只係$800,000有找！可以買到咩歐洲車？大概只可以買到M-Benz E350啦！有乜法子唔引到富豪都用Alphard做腳車？但心水清嘅朋友，筆者都想話你知，現時Alphard Hybrid賣$799,865、Alphard 350賣$738,000一啲都唔平！因為08年中上代350版初登場時只賣$535,000，4年唔夠貴咗超過$200,000！車市奇葩！

電子四驅

Alphard Hybrid採用四驅系統還是首次，主要布局同Lexus RX450h一樣，分前、後輪2組摩打，即係系統唔可以人手操作用四驅或兩驅，只可由行車電腦自行分配驅動力，而且有別於機械式四驅，前後輪之間冇傳動軸，一般情況只用由引擎及前摩打同時驅動嘅前輪帶動，遇上突發性加速或電腦感應到有輪胎打滑時，後摩打先會介入驅動後輪，由於平時完全冇機械帶動，所以唔會好似傳統四驅咁食油。

此外，Alphard Hybrid亦效法Prius V將充電池收入手枕位內，雖然電池未有用最新鋰電，亦令前排冇得同中排貫通，但咁樣可以避免將電池收入車尾底影響最後排空間，都算係好辦法。

加速稍遜

好多人以為車價同性能表現係成正比，但Alphard Hybrid比350版賣貴6萬幾，性能並唔會勁得去邊。採用2.4公升引擎，最大馬力有150匹，加埋前、後摩打輸出後，系統總馬力得190匹，同350版嘅272匹有大段距離。而事實筆者試車時都發覺，如果引擎未介入或處於低轉時，行車聲音係好靜，甚至比350版嘅V6引擎更靜。不過，當加速時引擎就發出一定聲音，比240版本嘅引擎更嘈，而且加速力亦弱過350版一大截，原全係兩個境界表現。

講性能Hybrid版輸晒，付出多咗嘅車價全部去晒環保慳油科技上，廠方公布耗油數值係17.0km/L，比350版9.3km/L好得多。如以呢個數據計數，Hybrid喺香港理應做到低於$1.0/km表現，你信嗎？呢個數值當然係喺極理想情況下刷新，筆者試車當日用最嘥油方法試車，因為試車牌所以全程載3個人，但近4小時未熄過車，全時間開冷氣、音響及燈，又塞車又行高速狂轟，行咗64.8km，共入咗$134油錢，即係要$2.06/km！唔算平，但總算有交代。

Toyota Alphard Hybrid Spec.
引擎形式：2,362c.c.直四
引擎馬力：150ps/6,000rpm
引擎扭力：19.4kgm/4,000rpm
摩打形式：同步交流電動摩打（恆久磁石）
摩打馬力：前143ps、後68ps
摩打扭力：前27.5kgm、後13.3kgm
系統總輸出：190ps
傳動：CVT無段變速
懸掛：前麥花臣支柱、後扭力桿
制動：前透氣碟、後實心碟
車身：4,870×1,830×1,905mm
車價：$799,865
查詢：皇冠汽車（2305 4555）